5/25/2020
Today from Hiiraan Online:  _
Wararka Maanta- Jimco, May 22, 2020
Madaxweyne Deni oo wasiirro cusub magacaabay kuwo kalena eryay


 

Jimco, May 22, 2020 (HOL) - Madaxweynaha dowlad goboleedka Puntland, Siciid Cabdulaahi Deni ayaa caawo shaqada ka eryay wasiirro iyo ku xigeeno katirsanaa golihiisa wasiiradda, isagoo kuwa kale ku bedelay.

Qoraal kasoo baxay xafiiska madaxtooyada Puntland, ayaa lagu sheegay in madaxweynuhu xilkii ka qaaday labo wasiir oo kala ah, wasiirkii warfaafinta, Cali Sabarey iyo wasiirkii kalluumaysiga Faarax Cawaash.

Labadan wasiir ee lagu bedelay labo xubnood oo horey wasiirro ugasoo noqday maamuladii hore ee Puntland, waxayna kala yihiin, Cabdulaahi Xirsi Timacadde, oo loo magacaabay wasiirka warfaafinta. Wuxuu horey u ahaa wasiirkii hore ee arrimaha gudaha maamulkii Cabdiweli Gaas.

Wasiirka labaad ee la magacaabay, waa wasiirka kalluumaysiga Puntland waxaana loo magacaabay Maxamuud Xaaji Saalax. Wuxuu horey usoo noqday wasiirkii beeraha iyo waraabka maamulkii Cabdiraxmaan Faroole.

Sidoo kale, madaxweyne Deni ayaa magacaabay wasiir ku xigeeno cusub, kuwaas oo kala ah,

Cabdi Ibrahim Warsame (Qawdhan), Wasiir ku-xigeenka Maaliyadda.

Ismaacil Saleeban Geelle. Wasiir ku-xigeenka Wasaaradda Amniga.

Axmed Siciid Ismaciil (Qolombe), Wasiir ku-xigeenka Wasaaradda Biyaha, Tamarta iyo Macdanta

Saynab Ismaciil Maxamed, Wasiir ku-Xigeenka Wasaaradda Deeganka, Beeraha iyo Isbadalka Cimiladda

Maxamed Axmed Xasan. Wasiir ku-xigeenka Wasaaradda Shaqada, Shaqalaha, Dhalinyaradda iyo Ciyaaraha

Maxamed Axmed Ismacil (Deero Dile). Wasiir ku-xigeenka Wasaaradda Qorshaynta, Xirirka Caalamiga ah iyo Horumarinta Dhaqalaha.

Magacaabistaan, waxaa lagu sheegay in madaxweyne Deni uu kala tashaday madaxweyne ku xigeenka Puntland oo uu horey khilaafka uga dhexeeyay.

Abdiweli M. Sheikh, Hiiraan Online
abdiwali.sheikh@hiiraan.com









Click here
5/22/2020 7:45 PM EST
Jimco, May 22, 2020 (HOL) - Dowladda Soomaaliya ayaa goor dambe oo caawo ah shaacisay inay berito tahay maalinta koowaad ee bisha Shawwaal iyo ciidul Fidri, iyada oo burisay go'aan horey ugasoo baxay caawo fiidkii oo lagu sheegayay in ay beri Soon tahay.

5/22/2020 11:29 AM EST
Jimco, May 22, 2020 (HOL) - Maxkamadda gobolka Benaadir ayaa qabatay dacwad uusoo gudbiyay Ururka Qaranka Suxufiyiinta Soomaaliyeed ee NUSOJ oo ka codsaday in maxkamaddu ay farto Xafiiska Xeer Ilaaliyaha Guud ee Qaranka in uu baaris ku sameeyo dilalka loo geystay in ka badan 50 suxufi oo Soomaaliya lagu dilay.

5/22/2020 7:37 AM EST
Jimco, May 22, 2020 (HOL) - Wakiilka Midowga Afrika ee Soomaaliya Francisco Madeira oo qudbad ka jeediyay kulankii golaha ammaanka ee Qaramada Midoobay ee looga hadlayay arrimaha Soomaaliya ayaa ka hadlay xaaladaha siyaasadeed ee Jubbaland iyo heshiis ay gaareen hogaanka Jubbaland iyo xubno kamid ah garabyada Mucaaradka Jubbaland.

5/22/2020 7:23 AM EST
Jimco, May 22, 2020 (HOL) - Maamulka Suldada Falastiin ayaa si cad u diiday gar-gaar loogu tala-galay ka hortagga Coronavirus oo ay Imaaraadka usoo mariyeen Isra’el Khamiistii shalay, maamulkaas ayaa sheegay in loo baahnaa in deeqdaasi si toos ah loogu soo hagaajiyo madaxda Falastiin, iyadoo aan lasoo marsiin dhinaca Yuhuudda.

5/22/2020 6:42 AM EST
Jimco, May 22, 2020 (HOL) - Dowladda Maraykanka ayaa ugu baaqday madaxweyne Farmaajo inuu sida ugu dhaqsaha badan uguna macquulsan u qabto kulanka Golaha Amniga Qaranka, si looga wada hadlo qorsheynta doorashada soo socota, iskaashiga amniga, iyo waxyaabaha kale ee mudnaanta leh ee qaranka.

5/22/2020 6:15 AM EST
Jimco, May 22, 2020 (HOL) - Madaxweyne Donald J. Trump ayaa mar kale sheegay hadallo adag oo xanaf leh oo ay dhibsan doonaan dalal badan oo uu kamid yahay Ruushka, kadib markii uu qeexay in waddankiisa uu ka bixi doono heshiis horay loo galay oo dhigayay in diyaaradaha aan hubeysneyn ay si xor ah ku gooshi karaan hawada dhinacyada heshiinkaan saxiixay.

5/22/2020 6:02 AM EST
Jimco, May 22, 2020 (HOL) - Wararka ka immaanaya gobolka Gedo ee koonfurta Soomaaliya ayaa waxay sheegayaan in xalay dagaal qaatay muddo ku dhowaad saacad ah uu dhex-maray ciidamada dowladda ee halkaasi jooga iyo Al-shabaab.

5/22/2020 5:28 AM EST
Jimco, May 22, 2020 (HOL) - Golaha ammaanka ee Qaramada midoobe ayaa ka hadlay xaaladda Soomaaliya , iyagoo warbixin ka dhageystay ergayga gaarka ah ee Jimciyadda quruumaha ka dhexeysa u qaabilsan Soomaaliya James Swan iyo safiirka midowga Afrika ee Soomaaliya Danjire Francisco Madera, waxayna ka hadleen labadaba arrimihii ugu dembeeyay Soomaaliya , sida doorashooyinka iyo dagaalladii u dhexeeyay ciidamada dowladda iyo Al-shabaab, si gaar ah kii Jannaale.

5/22/2020 5:06 AM EST
Jimco, May 22, 2020 (HOL) - Waxaa dalka Soomaaliya lagusoo celiyay muwaadiniin Soomaaliyeed oo ku xayirnaa illaa iyo seddex waddan kuwaasi oo uu saameeyay socdaal joojinta uu sababay xanuunka Coronavirus ee caalamka.